ሕውየት ማለት ምስተጸገምካ ጥራይ እትኸዶ ጕዕዞ ኣይኰነን። ብርግጽ ጓሂ፡ ጭንቀት፡ ኣንፈት ምጥፋእ፡ ምስልካይ ወይ ካልእ ናይ ህይወት ብድሆታት ክመጹ ኸለዉ ዕዮ ሕውየት የድሊ እዩ። ዝበለጸ ዕዮ ሕውየት ግና ስቕያት ህይወት ምስገጠሙና ዘይኰነ፡ ባዕልና እነበግሶ ናይ ዕብየት ዕዮ ክኸውን ከሎ እዩ ንሓዋሩ ዝበለጸ ውጽኢት ዝህልዎ።

​ሕውየት ናብ ምልኣት ዝግበር ጉዕዞ እዩ። ኣብ ውሽጥና ዝዓመቘ ህድኣት እንረኽበሉ፡ምስ ሰባት ዝበለጸ ዝምድናታት እንተኽለሉ፡ ምስ ፈጣሪ ድማ ናብ ዝሓየለ ርክብ እንኸደሉ ጉዕዞ እዩ። ዝተሰወረና ትርጉም ህይወት እነግህደሉ፡ ዝተሓብኣና ዕላማ ህይወት እነለልየሉ፡ ዝደብዘዘ ምስሊ ህይወት እነነጽረሉን ነባሪ ውሽጣዊ ህድኣት እንረኽበሉን ኣገባብ እዩ። ​

​

ሓደ መደብ ሕውየት ብጥንቃቐን ብዕምቈትን ኣብ ምስማዕ፡ ኣብ ኣስተንትኖን ተፍትሽን ዝምርኰስ ዕዮ እዩ። ነፍሲ ወከፍ ሰብ ነናቱ ፍሉይ ዛንታ ሒዙ እዩ ዝመጽእ፡ እቲ ዝስዕብ ዝርርባት ከኣ ነናቱ ፍሉይ መኣዝናት ይኽተል። እቲ መደብ ንስኻ መን ምዃንካ ብምርዳእ ይጅምር። እንታይ የድልየካ ኣሎ፧ ኣብዚ መዓልቲ እዚ እንታይ ዝመስል ተመክሮታት፡ ሕቶታት፡ ብድሆታት፡ ተስፋታት  እዩ ንህይወትካ ዝመርሓ ዘሎ፧ ​

​​

ብሓባር ነቲ ልዕሊ ኹሉ ዝዓጠኩም ዘሎ ጉዳያት ንድህስሶ። እቲ ዘገድሰኩም ጉዳይ ውሽጣዊ ዕቤት ክኸውን ይኽእል፡ ጉዳይ መንፈሳዊ ዕቤት እውን ክኸውን ይኽእል። ኣብ ዝምድናታትኩም ዝበለጸ ኣተሓሕዛ ኽህልወኩም ትደልዩ ትዀኑ። መሰጋግሮ ምዕራፋት ህይወት ዘስዕቦ ምድንጋር ክበርሃልኩም ትደልዩ ትህልዉ። ስንጭሮ ጓህን ክሳራን ንምስጋር፡ ውሽጣዊ መንነት ንምንጻር፡ ናይ ምፍጣርን ምዕዋትን ክእለትኩም ንምሕያል፡ ከምኡ እውን ዝዓበየ ሰላም ህይወት ምንዳይ ክትመጹ ትኽእሉ።

​

እዚ መደባት ምርዳእ ዝዓምቈሉን ሕውየት ዝጅምረሉን ብኽፉት ልቢ፡ ሓቀኛ ኣጠማምታን ዓሚቝ ኣስተንትኖን ዘቐድም ዝርርባት እዩ።​

​​

እዚ መደባት ዛንታን ደረጃን ህይወት፡ እምነት ወይ ባህሊ ብዘየገድስ ንኹሎም ሰባት ዘአንግድ እዩ። ዕብየት ተናድዩ እንተሊኹም ብደሓን ምጹ። ሕውየት ተናድዩ እንተለኹም እውን ብደሓን ምጹ።